ADVISORS:

HTC Tuiasosopo Asovalu,
HTC Nanai Afuola,  
HC Gaoteote Palaie Tofau,
Senate President (2009 - Present)




Greetings from Taitai Pese:
Ole a taoto ia fa'alaau tapu'e ou paia Samoa, aua o Oe ole ao mamala ile  faasouga o ao male atu Folasa. O paia ua taoto a'o taotoga o I'a Sa. Ae tau ia ina ou saua ile va ina nei fai ma lape o le taumafaiga vaivai a lenei Aufaipese. Ae le mafai ona faagaloina lau nofo tapuai mai Vatia si o'u nu'u pele. Ole paia lava lea ile Susu ole Tamaitai ole Ao, Afio Tagoilelagi, Susu Nofofanau ma Usoalii, Mamalu mai oulua Matua male fetalaiga ile Saufaiga. Ae maise ai foi le tapuaiga ile Au Faigaluega paia ale Atua, o lo'o fa'afale le malu i Vatia ona ole Atua ma lona finagalo.
     
Ua ou pese ai nei ile pese ale tama Eperu, Afai e galo Oe ia te a'u, ia galo i lo'u lima taumatau. Afai oute le ta'uta'uina Oe ia pipii a'e lo'u laulaufaiva i lo'u gutu, pe afai oute le faasili oe Vatia i mea uma oute faia.
     
Ona o A'u ole Taitai Pese, oute momoli atu ai le faamalo male faafetai ia te outou uma o Uo ma Au mea mamae ae maise ai Tama fanau ale nuu o lo'o salalau solo i itu e fa ole lalolagi aua le sailiga manuia faapea ai le feagai ma aoaoga. Ae maise ai outou o lo'o ta'ase ona ole galuega a le Atua. Matou te lagona le pa'i mai o a outou talosaga ua manuia ai taumafaiga a lenei Aufaipese.

O lo'o tu'i atu pea le mulipapaga a'o e alo faiva. E iai se malama ile lumanai ole a fa'ase'e tuagalu ai lo matou sa, ae faatali atu mo outou lupe ole foaga.

Fai mai le Aposetolo o Nu'u Ese,E le o se mea fa'aleaoga lo outou tautiga ile Alii. Aua a uma ona outou faia o ia mea ona outou faapea ane lea,O auauna le aoga i matou male faatauvaa.

Faafetai,
O Vaisa Silise Tagaloa
Taitai Pese


Say Talofa and Soifua
GUESTBOOK

View Guestbook
Sign Guestbook